Skrifað 30/12/2020
Kæru veiðimenn og veiðikonur.
Megi árið 2021 færa ykkur gæfuríkt ár og góða veiði.
Veiðihúsið á Rjúpnaási við Norðurá var vel nýtt í sumar þrátt fyrir Covid 19 veirufaraldur. Heimtur á laxi voru hins vegar dræmar því miður. Vonast er til að úr því rætist næsta sumar. Á komandi sumri mun verða tekið í notkun annað húsnæði fyrir Norðurá II í júlí og ágúst sem mun vonandi líka vel.
Í fyrra og í haust var unnið að því að bæta aðgengi að ánni og voru slóðar bættir á Munaðarnes svæðinu og stóðu landeigendur að framkvæmdinni. Einnig var unnið að því að hemja ána í sínum hefðbundna farvegi fyrir landi Hafþórsstaða með aðkomu Fiskræktarsjóðs og er með því vonast til að endurheimta gjöfula veiðistaði.
