Norðurá var opnuð hinn 4. júní.
Áin var vatnsmikil en tær.
Við opnunina veiddu þau Þórunn Sveinbjörnsdóttir, formaður Félags eldri borgara, og Sindri Sigurgeirsson, formaður Bændasamtaka Íslands.
Þau fengu bæði fljótlega lax á færið og Þórunn náði að landa fyrsta laxinum rétt fyrir klukkan 9. Reyndist það vera væn hrygna, 79 sm og 5,2 kg eða 10,5 pund.
Skömmu síðar landaði Sindri hæng sem var 82 cm og um það bil 5.7 kg eða 12 pund.
Samtals veiddust 15 laxar opnunardaginn, en 9 töpuðust til viðbótar. Var öllum laxi sleppt nema tveimur sem blæddi og voru þeir færðir veiðihúsinu. Laxar voru stórir og lengst þurfti að þreyta í 45 mínútur, en sá slapp að lokum eftir hlaup niður eftir Almenning frá Brotinu.
Strax 5. júní varð vart við smálax sem boðar gott og væntum við að veiði verði áfram spennandi og tökur margar.
Myndir: Sigrún Ása Sturludóttir
